ഒറ്റമരങ്ങൾ

ഉഷ്ണരേണുക്കൾ പൊള്ളിക്കുന്ന-
ഗ്രീഷ്മത്തിൽ,
ജീവിതത്തിലേക്കുള്ള
ദൂരമളന്ന്,
ഇതളുകൾ പൊഴിക്കുന്ന ഒറ്റമരം.

ശിഖരങ്ങളടർന്ന്,
ഉഷ്ണ ചിന്തകളിലമർന്ന്,
ഊർദ്ധ്വശ്വാസം വലിക്കുന്ന
പകലിൽ-
ഒരു വേനൽ മഴ

മഴയിൽ കൊരുത്തൊരു

പ്രണയത്തിൽ,

വഴിമരങ്ങളുടെ
അതിജീവനത്തിന്റെ- 

ആത്മാർപ്പണം

ഇന്നെലകളില്ലാത്ത

ഘടികാരസൂചികൾപോലെ-

എഴുതപ്പെടാത്ത 

പ്രണയങ്ങൾ

ഇനി.... 

നീ തന്ന ചൂടും 

തിരിച്ചെടുക്കാം....

മൌനം മറന്ന നിൻ- 

ചുണ്ടുകൾക്കൊപ്പം.

ഇഴ പിരിയാത്ത ഈ മഴയിൽ 

ഇതളുകൾ കൊരുത്ത്,

പ്രത്യാശാ ഭരിതമായ്,

എത്രയെത്ര 

ഒറ്റമരങ്ങൾ.....