വാക്ക് നഷ്ടപ്പെട്ടവർ

ഒറ്റവാക്കിൽ ഉത്തരം പറയാനുള്ള -

ചോദ്യത്തിന്,

ഒരു കുട്ടി വാക്ക് പരതുന്നു.

വാക്ക് തൊണ്ടയിൽ കുരുങ്ങി-

ഭാഷ തിരയുന്നു.

ലിപികളില്ലാതെ ഭാഷ -

കുട്ടിയെ തോൽപ്പിക്കുന്നു.

ലിപികളുള്ളവർക്ക്-

വാക്ക് അധീനപ്പെടുന്നു.

കാടും നാടും അധീനപ്പെടുന്നു

ഭാഷ കൊണ്ടവർ ഭൂപടം വരക്കുന്നു

ഭാഷ ഒരു രാജ്യമാകുന്നു

വാക്ക് തിരഞ്ഞകുട്ടിയെ

ഗോത്രമെന്ന വരമ്പ് കെട്ടുന്നു

കാട്ടുഭാഷയെന്ന-

പേര് നൽകുന്നു.

ഭാഷ കാടിന്റെയെന്നും

നാടിന്റെയെന്നും അതിർത്തി കെട്ടുന്നു

ഭാഷനഷ്ടപ്പെട്ടവന്-

മധുവെന്നും

വിശ്വനാഥനെന്നും പേർ

ബാക്കിയുള്ളവരെല്ലാം-

പേരില്ലാത്തവരത്രെ..