ഒരു വീട് ബലാല്‍സംഗം ചെയ്യപെടുന്നു

ഭൂതകാലം മുറിച്ചു

മാറ്റപ്പെട്ടവളുടെ  

വര്‍ത്തമാനകാലം- 

ചൂഴ്ന്നെടുത്ത്-ചര്‍ച്ചകള്‍.

നിശാക്ലബിലെ-

ആഘോഷ രാവുപോലെ-

കണ്ണില്‍ കണ്ടവരെയൊക്കെ-

മാനഭംഗം ചെയ്യുന്നു.

ഓടാമ്പല്‍ ഇല്ലാത്ത 

വീടിന്‍റെ അളവെടുക്കാന്‍ 

വന്ന ക്യാമറ,

ഒരു പുറമ്പോക്ക് വീടിന്‍റെ 

നഗ്നത കണ്ട് ആര്ത്തിപെടുന്നു.

ഒരു വീട്-

ബലാല്‍സംഗം ചെയ്യപെടുന്നു. 

ദളിതന്‍റെ അടുക്കളയില്‍, കുഴി കുത്തി-

സംസ്ക്കരിക്കപെട്ടവരുടെ മൃതദേഹങ്ങള്‍-

ഉയിര്‍ത്തെണീറ്റ്,

സീരിയല്‍ മാറ്റി, ചാനല്‍ ചര്‍ച്ച കണ്ട്-

കണ്ണീര്‍ വാര്‍ക്കുന്ന,

പെന്‍ഷന്‍ പറ്റിയ വിപ്ലവകാരികളെ-

നോക്കി ഇളിഭ്യരാക്കി- 

ചിരിക്കുന്നു.

കവിതയെഴുതി കാശ് വാങ്ങി-

ശീതികരിച്ച മുറിയില്‍ 

കിടന്നുറങ്ങിയ കവിയെ- 

വിളിച്ചുണര്‍ത്തി ഇര പറയുന്നു,

ഭൂതവും ഭാവിയും വര്‍ത്തമാനവും 

ഇല്ലാത്തവരത്രേ ദളിതര്‍