മൃദുവായി-

ഇലകൾ പോലുമറിയാതെ,

ചെടിയിൽ നിന്നടരുന്ന-

പൂവിന്റെ കൊഴിഞ്ഞു പോക്കുപോലെ -

പ്രണയം ഉപേക്ഷിക്കണം.

സ്വയം തീർപ്പാക്കേണ്ട ഈ 

പ്രണയത്തെ കുറിച്ചാണ് നിങ്ങൾ

അനുദിനം കലഹിക്കുന്നത്

കഴുത്ത് മുറിക്കുന്നത്.

വാക്കുകൾ മരിച്ച വീട്

വാക്കുകൾ മരിച്ച ഒരു വീട്

പ്രതീക്ഷകളുടെ ഊഴം കാത്ത് -

കനവുകൾ നെയ്യുന്നു. 

 

വാക്കുകൾ മരിച്ച ഒരു വീട്-

നിറവിലും-

നിഴലുകൾപോലും 

കൂട്ടിമുട്ടാത്തത്ര കണിശതയോടെ - 

ചതുരംഗം കളിക്കുന്നു-

.

വാക്കുകൾ മരിച്ച ഒരു വീട്ടിൽ-

മൗനം മുനിഞ്ഞു കത്തുന്ന 

രാവുകളിൽ -

ഒരിറ്റു വാക്കിനായ്-

തൊണ്ട വരളുന്നു.

വാക്കുകൾ മരിച്ച ഒരു വീട്ടിൽ-

തൂങ്ങിയിറങ്ങിയ  

കണ്‍പോളകൾ,

കാലത്തിന്റെ അനുവാചകരായ്,

സെക്കൻഡ് സൂചികളുടെ-

മിടിപ്പുകൾ പേറുന്നു.

വാക്കുകൾ മരിച്ച ഒരു വീട് പോലെ-

ഭീതിതമായ ഒരു  ഭൂപ്രദേശമില്ല..

വാക്കുകൾ മരിച്ച ഒരു വീട്-

പ്രതീക്ഷകളുടെ 

ഊഴം കാത്ത് 

കനവുകൾ നെയ്യുന്നു.