കേരളം കെപിപി നമ്പ്യാരെ വേണ്ടവിധം ആദരിച്ചോ?

കണ്ണൂര്‍ ജില്ലയിലെ കല്യാശ്ശേരിയിലെ ഒരു സാധാരണ ഗ്രാമീണ കുടുംബാംഗമായിരുന്ന കുന്നത്ത് വീട്ടില്‍ പത്മനാഭന്‍ നമ്പ്യാര്‍ എന്ന കെപിപി നമ്പ്യാര്‍ കല്യാശ്ശേരി ബോര്‍ഡ് ഹയര്‍ എലമെന്ററി സ്‌കൂളില്‍ നിന്നും ലണ്ടനിലെ അതിപ്രശസ്തമായ ഇംപീരിയല്‍ കോളേജ് ഓഫ് സയന്‍സ് ആന്‍ഡ് ടെക്‌നോളജിയിലേക്കുള്ള യാത്ര ഒരു പോരാട്ടമായിരുന്നു. 1929 ഏപ്രില്‍ 15 ന് കല്യാശ്ശേരിയിലെ ഒരു കമ്യൂണിസ്റ്റ് കുടുംബത്തില്‍ ജനിച്ച അദ്ദേഹത്തിന്റെ ജീവിതമത്രയും ഇതുപോലുള്ള പോരാട്ടങ്ങളുടെയും അതില്‍ നേടിയ വിജയവും നിറഞ്ഞതായിരുന്നു.

1948 ലെ കല്‍ക്കത്ത തിസീസിന്റെ പേരില്‍ വേട്ടയാടപ്പെട്ട കമ്യൂണിസ്റ്റ് കുടുംബമായിരുന്നു അദ്ദേഹത്തിന്റെത്. അതിന്റെ പേരില്‍ നാടുവിടേണ്ടി വന്ന കെപിപി നമ്പ്യാര്‍ നേരെയെത്തിയത് ബോംബെയിലെ പ്രസിദ്ധമായ സെന്റ് സേവിയേഴ്‌സ് കോളേജിലായിരുന്നു. അഡ്വാന്‍സ്ഡ് റേഡിയോ കമ്മ്യൂണിക്കേഷനില്‍ ബിരുദാനന്തര ബിരുദത്തിനായി ചേര്‍ന്നത് അദ്ദേഹത്തിന്റെ ജീവിതത്തിലെ വഴിത്തിരിവ് ആവുകയായിരുന്നു. അതിനുശേഷം അദ്ദേഹം ലണ്ടന്‍ യൂണിവേഴ്‌സിറ്റിയിലെ പ്രശസ്തമായ ഇംപീരിയല്‍ കോളേജില്‍ നിന്ന് ടെലികമ്യൂണിക്കേഷനില്‍ നിന്ന് ബിരുദാനന്തര ബിരുദം നേടുകയും ചെയ്തു.

കടുത്ത ദേശീയതാബോധത്തിന്റെ ഉടമയായിരുന്നു അദ്ദേഹം. ഇന്ത്യയില്‍ തിരികെയെത്തി ഐഐടി ഡല്‍ഹിയില്‍ അദ്ധ്യാപകനാകുകയും പിന്നീട് ടാറ്റയുടെ ഗവേഷണ വിഭാഗത്തിന് രൂപം കൊടുക്കുകയും ചെയ്തൂ. ട്രാന്‍സിസ്റ്റര്‍ റേഡിയോ തദ്ദേശീയമായി വികസിപ്പിച്ചെടുത്ത് ഇന്ത്യന്‍ വ്യവസായ മേഖലയില്‍ ഇലക്‌ട്രോണിക്‌സ് പ്രയോഗങ്ങളുടെ പ്രവേശനത്തിന് തുടക്കം കുറിക്കുകയും ചെയ്തു. അക്കാലത്ത് അദ്ദേഹത്തിന്റെ നേതൃത്വത്തില്‍ ഇറങ്ങിയ ‘നെല്‍കോ’ റേഡിയോ ഇന്ത്യയുടെ അഭിമാനം ഊട്ടിയുറപ്പിച്ചു.

മാതൃരാജ്യത്തോടുണ്ടായിരുന്ന അതേ പ്രണയം ജന്മദേശമായ കേരളത്തോടും അദ്ദേഹം പുലര്‍ത്തിയിരുന്നു. അച്യുതമേനോന്‍ മുഖ്യമന്ത്രിയായിരുന്ന കാലഘട്ടത്തില്‍ ഇലക്‌ട്രോണിക്‌സ് രംഗത്തെ കേരളത്തിന്റെ കുതിച്ചു ചാട്ടത്തിനായി കെപിപി നമ്പ്യാരുമായി ബന്ധപ്പെടുകയും കെല്‍ട്രോണ്‍ എന്ന വിപ്ലവകരമായ ആശയം സാധ്യമാക്കിയെടുക്കുകയും ചെയ്തു. ഈ സമയം ടാറ്റയിലെ റിസര്‍ച്ച് ആന്‍ഡ് ഡെവലപ്‌മെന്റ് വിംഗില്‍ നിന്ന് രാജിവച്ചായിരുന്നു അദ്ദേഹം കേരളത്തിലെത്തിയത്. നമ്പ്യാര്‍ ടാറ്റയിലുണ്ടായിരുന്ന സമയത്ത് രത്തന്‍ ടാറ്റ അദ്ദേഹത്തിന്റെ കീഴില്‍ ജോലി നോക്കിയിരുന്നു.

കെല്‍ട്രോണിന്റെ റിസര്‍ച്ച് വിംഗായി ER&DC(ഇലക്‌ട്രോണിക്‌സ് റിസര്‍ച്ച് ആന്‍ഡ് ഡെവലപ്‌മെന്റ് സെന്റര്‍)യെ വളര്‍ത്തിയെടുക്കുകയും പിന്നീട് ഇന്ദിരാഗാന്ധി പ്രധാനമന്ത്രിയായിരുന്ന കാലത്ത് ഇതിനെ ER&DCI ആക്കിമാറ്റി കേന്ദ്രത്തെ കൊണ്ട് ഏറ്റെടുപ്പിക്കുകയും ചെയ്തു.

1986 ല്‍ ഇലക്‌ട്രോണിക്‌സ് മേഖലയിലെ നിസ്തുലമായ പ്രവര്‍ത്തനത്തിന്റെ അടിസ്ഥാനത്തില്‍ ഇന്ദിര ഗാന്ധി അദ്ദേഹത്തിനെ ഇലക്‌ട്രോണിക്‌സ് വകുപ്പിന്റെ സെക്രട്ടറിയായി നിയമിക്കുകയും ചെയ്തു. C-DAC (സെന്റര്‍ ഫോര്‍ ഡെവലപ്‌മെന്റ് ഓഫ് അഡ്വാന്‍സ്ഡ് കമ്പ്യൂട്ടിംഗ്)ന്റെ രൂപീകരണത്തിനും അദ്ദേഹത്തിന്റെ പങ്ക് വിലമതിക്കാനാവാത്തതാണ്.

സുരക്ഷയുടെ പേരുപറഞ്ഞ് യു എസ് ഗവണ്‍മെന്റ് ഇന്ത്യക്ക് സൂപ്പര്‍ കമ്പ്യൂട്ടര്‍ നല്‍കുവാന്‍ തയ്യാറാകാതിരുന്നപ്പോള്‍, നമ്പ്യാര്‍ ER&DCI ഡയറക്ടര്‍ ആയിരുന്ന വിജയ് ഭട്കറിനോട് C-DAC രൂപീകരിക്കാന്‍ നിര്‍ദേശിക്കുകയും, ഇന്ത്യ തദ്ദേശീയമായി സൂപ്പര്‍ കമ്പ്യൂട്ടര്‍ നിര്‍മ്മിക്കുകയും ചെയ്തതിന് ചരിത്രം സാക്ഷ്യം.

കെപിപി നമ്പ്യാറിന്റെ ഊര്‍ജ്ജസ്വലമായ പ്രവര്‍ത്തനങ്ങള്‍ ആയിരുന്നു ഇലക്‌ട്രോണിക്‌സ് സാങ്കേതിക വിദ്യയില്‍ രാജീവ് ഗാന്ധിയുടെ കാലത്ത് ഉണ്ടായ വിപ്ലവകരമായ മാറ്റങ്ങള്‍ക്ക് കാരണമായത്.

ഇന്ത്യയില്‍ ആദ്യമായി ടെക്‌നോപാര്‍ക് എന്ന ആശയം കെപിപി നമ്പ്യാരുടെ സംഭാവനയായിരുന്നു. കേരളത്തിലെ ടെക്‌നോപാര്‍ക് ഇന്ത്യയിലെ ആദ്യത്തെ ടെക്‌നോളജി പാര്‍ക്ക് ആയതിനു പിന്നില്‍ വ്യവസായ മന്ത്രിയായിരുന്ന കെ ആര്‍ ഗൗരിയമ്മയുടെ സഹായവും ഉണ്ടായിരുന്നു.

കേരളം അദ്ദേഹത്തിന്റെ നിസ്തുലമായ പ്രവര്‍ത്തനങ്ങള്‍ക്ക് വേണ്ടവിധത്തില്‍ അംഗീകരിച്ചിട്ടുണ്ടോയെന്ന് സംശയമാണ്. 2006 ല്‍ പത്മഭൂഷണ്‍ നല്‍കി രാജ്യം ആദരിച്ചെങ്കിലും അതിന്റെ ശിപാര്‍ശ പോയത് കേരളത്തില്‍ നിന്നായിരുന്നില്ല.

ഇന്ത്യന്‍ ഇലക്‌ട്രോണിക്‌സ് രംഗത്തിന്റെ നേരായ വഴികാട്ടിയായിരുന്നു കെപിപി നമ്പ്യാര്‍. അദ്ദേഹത്തിന്റെ വേര്‍പാടില്‍ രാജ്യത്തിന് നഷ്ടമായത് എക്കാലത്തെയും മികച്ച ഒരു ടെക്‌നോക്രാറ്റിനെയാണ്.

(C-DAC ലെ സയന്റിസ്റ്റും സീനിയര്‍ എഞ്ചിനിയറുമാണ് ലേഖകന്‍)

(Azhimukham believes in promoting diverse views and opinions on all issues. They need not always conform to our editorial positions)